Sejarah Gereja

Songon on ma ginuritton Sejarah singkat 25 (dua puluh lima) taon huria HKBP Tiberias Lumban Bulbul Res. Balige Distrik XI Toba Hasundutan sian taon 1991 sahat tu taon 2016.

Manghilalahon hinaringkot ni panogunon ni Debata marhite huriaNa di Lumban Bulbul on, tung dihalashon roha nami do pangaroditon ni huria Balige dohot sude Parhaladona na sai tongtong patupahon Partangiangan Lunggu siganup ari Minggu botarina di Lumban Bulbul on. Ditaon 1991 tongon di bulan Pebruari, ditutkukhi Tuhanta do roha ni sahalak Ina natuatua ima Op. Rumenta br Sibarani (+) na di Medan laho papunguhon angka ruas asa marpungu laho martangiang, siala dlibereng nasida mulai taon 1989 sahat tu taon 1990 dang adong be ruas ni Lumban Bulbul on laho marminggu tu Gareja Bolon (Balige) alani gogo nahurangan di angka natuatua mangeaahi parmigguan di Balige, alai sikkola minggu nunga mardalan dohot denggan do mardalan sebelum taon 1989 na pinatupa dibagas ni halak amanta Op.

Arisan Marpaung (+) dohot di bagas ni halak amanta Op. Humisar Marpaung, jala Guru Sikkola Minggu hathia i ima : Op. Arga br Siahaan, St. Rita br Marpaung dohot nai Juliper br Marpaung. Dihara nasida ma donganna manang piga halak ima : Op. Sondang br Siahaan (+), Op. Humisar Marpaung (+), dohot Op. Hisar Siahaan, papunguhon na olo martangiang dohot nasida. Maulilate ma di Tuhanta hinorhon ni ulaon i gabe adong ma parpunguan i jala dipatupa ma parmigguon di bagas ni ruas ni huria margantiangti di ganup ari Minggu botarina, jala dipatupa ma parmigguon na parjolo dibagas ni keluarga Op. Rumenta br Sibarani (+), na tongtong hinosbasan ni Parhalado sian Balige dung sidung parmigguon di Balige. Dung sae sian ganup bagas ni ruas ni huria dipatupa do parmigguon di bagasan parsikkoloan (SD Inpres Lumban Bulbul). Lam mangolu jala lam magodang do punguan i nang songon in nang angka las ni roha, alani do tubu ma sadani roha dohot tahi nami mambahen sada panghaton laho pajongjonghon Gareja songon inganan laho mamuji pasangaphon Tuhanta di Lumban Bulbul on.

Ala dang adong be dapot tano sahat tu Lumban Ginabean laho partapahan ni gareja, dibahen i marhite rapot ni ruas dohot pangituai ni Horja Lumban Bulbul tanggal 13 September 1992 dipasahat Horja Lumban Bulbul ma tano warisan manang par sikkolaan najolo bahen parmigguon laos ima nalaho partapahan ni Pembangunan Gareja on dohot ukuran 25 x 60 Meter na marbatas :

Sabola Utara : Tao Toba

Sabola Timur : SD Inpres Lumban Bulbul

Sabola Selatan : Tano Pangeahan (Milik Desa)

Sabola Barat : Tali Air (Bondar)

Ia pangituai ni horja hathia i (pihak I / yang menyerahkan) ima : Op. Basa Simangunsong (+), Op. Renta Simangunsong (+), Op. Marsaor Simangunsong (+), Op. Humisar Marpaung (+), W. Simangunsong /Op. Jeremy Simangunsong (+). Na di ketahui Kepala Desa Lumban Bulbul ima halak amanta Bistok Simangunsong (Op. Balata doli), jala pihak II / yang menerima hathia i ima HS Gultom (Guru Jemaat HKBP Balige), St. J. Sihotang (Parhalado Par artaon) jala ditolopi Pandita Ressrot Balige hathia i ima Pdt. A. Naiborhu (+). Jala dipahaluarma secara resmi Surat Penyerahan Tano ima ditanggal 20 September 1992.

Laos mamungka ari 13 Sepetember 1992 i di padiri ma Panitia Pembangunan sa godang ni 40 (opat puluh) halak laho mangula ulaon i ima na ni ketuaan ni amanta Kondar Simangunsong (Op. Sinokman), Sekretaris Patar Marpaung/Op. Raja Doli (+) dohot bendahara St. Mangloi Simangunsong/Op. Pardaemean (+). Jala dipungka do pembangunan i parjolo sahali mambongkar parsikkoloan, tung marsitutu do nasida mangulahon ulaon i asa hatumop jongjong Garejaan on, dihusiphon nasida do rencana i jala rantib horuanta on na marhite amanta Drs. EB Simangunsong (Ama Sondang), Ir Budiman Simangunsong (Ama Rina), Robinson Simangunsong (Op. Esia) dohot Drs. Peris Marpaung (+) dohot St. Jorianus Marpaung/Op. Levy (+), Tonggo br Simangunsong, St. O.F. Pardede.

Dung adong tarpunguon dana i dijouma pande bagas ni huria laho mamande i ima amanta : Morhan Simangunsong (Op. Ruben), Parulian Simangunsong (Op. Santi), jala dipungka ma peletakan batu pertama taon 1995 na ni uluhon ni Pdt. A. Naiborhu (+). Sidung ma pembangunan ni Garejanta on di taon 1997. Hir do nang hodok ni sude ruas margotong royong diparjongjong ni Bagas Joro on.

Torus do mardalan parmigguon di Lumban Bulbul di ganup ari Minggu botarina mulai taon 1992 sahat tu taon 1999. Marhite amanta Pdt. Tumpak Siahaan dohot amanta Guru Huria Burhanuddin Hutaoruk, tanggal 28 Augustus 1999 dipungka ma parmigguon manogot di Gareja Lumban Bulbul laos marrapot ma disi, asa mardalan ulaon parmigguon manogotna. Dos roha nami dirapot i, mangido sahalak Guru Huria na gok tingki jala saut do sangkap i ditanggal 12 September 1999 di ojakhon ma Guru Huria na gok tingki laho mangula di huria on ima Calon Guru Huria Pontius Cristopel Siregar, laos sadari i do ro surat Haputusan sian Pareses HKBP Distrik XI Toba Hasundutan mandok huria on gabe persiapan huria, nani ketuaan Op. Leo Simangunsong (+), Sekretaris ima St. Op. Putri Simangunsong, jala bendahara ima Op. Ruben br Simanjuntak na ditolopi Pandita Ressort Balige ima Pdt. Tumpak Siahaan dohot Guru Huria Tiberias Lumban Bulbul ima Cal. Gr. Pontius Cristopel Siregar.

Dung mardalan parmigguon manogotna lam hembang ma pamerenagn ni ruas Lumban Bulbul, marhite i naeng ma nian gabe huria nagok (mandiri) hurianta on namajane sian huria Balige. Dibahen i, tanggal 27 Pebruari 2000 dipatupa ma rapot huria jala dos do roha nang tahi disi, patupaon ma panjaeon sian huria Balige ima di tanggal 9 Juli 2000 laos dos do nang roha nami disi pasahatton tu Pimpinan ni Huria HKBP laho mangaririt goar ni huria on. Jala ditanggal 4 Juli 2000 sahat ma goar ni huria on na niririt ni Pimpinan, ima HKBP Tiberias Lumban Bulbul. Dengan do saluhutnai mardalan di bagasan asi ni roha ni Tuhanta dibahen i dipasahatma hurianta on tu Debata marhite ulaon pesta Peresmian dan MBO (Mameakahon Botoh OJahan) na ni uluhon ni Pimpinan HKBP marhite Pdt. WTP. Simarmata, MA, di tanggal 10 September 2000 na ni ketuaan ni amanta Op. Leo Simangunsong (Ketua I), Op. Sinokman Simangunsong (Ketua II), Op. Putri Simangunsong (Sekretaris I), Op. Nathalia Sitorus (Sekretaris II) (+), Op. Freil Tampubolon (Sekretaris III), jala Op. Ruben br Simanjuntak (Bendahara I), dohot St. R br Marpaung (Bendahara II).